ಸಿನಿಮೀಯ ಶೈಲಿಯ ಕಳ್ಳನ ಬಂಧನ: ಕಮಲದ ನಳಿಕೆಯ ಮೂಲಕ ಉಸಿರಾಡುತ್ತಾ 5 ಗಂಟೆ ಕೆರೆಯಲ್ಲೇ ಅವಿತಿದ್ದ ಕಿರಾತಕ!
ಸಿನಿಮಾಗಳಲ್ಲಿ ಹೀರೋ ಅಥವಾ ವಿಲನ್ ಪೊಲೀಸರಿಂದ ತಪ್ಪಿಸಿಕೊಳ್ಳಲು ನೀರಿನೊಳಗೆ ಪೈಪ್ ಇಟ್ಟುಕೊಂಡು ಉಸಿರಾಡುವುದನ್ನು ನೀವು ನೋಡಿರಬಹುದು. ಅದೇ ತಂತ್ರವನ್ನು ನಿಜ ಜೀವನದಲ್ಲಿ ಬಳಸಿದ ಕಳ್ಳನೊಬ್ಬ ಈಗ ಪೊಲೀಸರ ಅತಿಥಿಯಾಗಿದ್ದಾನೆ.ಮಧ್ಯಪ್ರದೇಶದ ಸಿಹೋರಾ ರೈಲ್ವೆ ನಿಲ್ದಾಣದಲ್ಲಿ ಮಹಿಳಾ ಪ್ರಯಾಣಿಕರನ್ನು ಗುರಿಯಾಗಿಸಿಕೊಂಡು ದರೋಡೆ ಮಾಡುತ್ತಿದ್ದ ಉತ್ತರ ಪ್ರದೇಶ ಮೂಲದ ಈ ಕಳ್ಳನನ್ನು ಹಿಡಿಯಲು ರೈಲ್ವೆ ಸುರಕ್ಷಾ ಪಡೆ (RPF) ಬಲೆ ಬೀಸಿತ್ತು. ಪೊಲೀಸರು ಸುತ್ತುವರಿಯುತ್ತಿದ್ದಂತೆ ಚಾಣಾಕ್ಷ ಕಳ್ಳ ಹತ್ತಿರದ ಕೆರೆಗೆ ಹಾರಿ ನಾಪತ್ತೆಯಾಗಿದ್ದ.
5 ಗಂಟೆ ಕಾಲ ಸತತ ಶೋಧ: ಕಳ್ಳ ಕೆರೆಗೆ ಹಾರಿದರೂ ಎಲ್ಲಿಯೂ ಮೇಲೆ ಬಾರದಿದ್ದಾಗ ಪೊಲೀಸರಿಗೆ ಗೊಂದಲವುಂಟಾಯಿತು. ಕೊನೆಗೆ ಮುಳುಗುತಜ್ಞರನ್ನು ಕರೆಸಿ ಹುಡುಕಾಟ ನಡೆಸಿದಾಗ ಆತ ಸಿಕ್ಕಿಬಿದ್ದಿದ್ದಾನೆ.
ಕಮಲದ ನಳಿಕೆಯೇ ಆಸರೆ: ನೀರಿನ ಒಳಗಿದ್ದ ಕಮಲದ ಹೂವಿನ ಟೊಳ್ಳಾದ ನಳಿಕೆಯನ್ನು (Lotus Stem) ತನ್ನ ಬಾಯಿಯಲ್ಲಿಟ್ಟುಕೊಂಡು, ಅದರ ಮೂಲಕ ಹೊರಗಿನ ಗಾಳಿಯನ್ನು ಸೇವಿಸುತ್ತಾ ಸುಮಾರು 5 ಗಂಟೆಗಳ ಕಾಲ ನೀರಿನಡಿಯೇ ಅಡಗಿ ಕುಳಿತಿದ್ದ!
ಬಂಧಿತ ಆರೋಪಿ ಉತ್ತರ ಪ್ರದೇಶದ ಬಿಜ್ನೋರ್ ನಿವಾಸಿ ಎಂದು ಗುರುತಿಸಲಾಗಿದ್ದು, ಈತನ ಮೇಲೆ ಈಗಾಗಲೇ ವಿವಿಧ ರಾಜ್ಯಗಳಲ್ಲಿ ಸುಮಾರು 24 ಪ್ರಕರಣಗಳು ದಾಖಲಾಗಿವೆ. ಪ್ರಮುಖವಾಗಿ ರೈಲುಗಳ AC ಕೋಚ್ಗಳಲ್ಲಿ ಮಹಿಳೆಯರನ್ನು ದರೋಡೆ ಮಾಡುವುದು ಈತನ ಕಾಯಕವಾಗಿತ್ತು.
ಕಳ್ಳನ ಈ ವಿಚಿತ್ರ ಸಾಹಸವನ್ನು ಕಂಡು ಪೊಲೀಸರೇ ಬೆಕ್ಕಸಬೆರಗಾಗಿದ್ದಾರೆ. ಸದ್ಯ ಈ ‘ಬ್ರೀತಿಂಗ್ ಟ್ರಿಕ್’ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗುತ್ತಿದೆ.
